سؤال محير ناس كتير خاصة ممارسي الرياضة إيه الأهم والأفضل المكملات ولا الأكل؟ و إيه الفرق بينهم؟
الأكل هو كل العناصر الطبيعية الصالحة للاستخدام الادمي و تشمل العناصر الغذائية من بروتين و نشويات و دهون و سكريات بمصادرهم المختلفة اللى بنقدر نتغذى عليها بشكل طبيعي سواء بنمارس رياضة أو لاء سواء رجال, سيدات, أطفال مفيش إنسان يقدر يستغنى عن الأكل الطبيعى, و نظام الأكل الطبيعى المفروض بيكون 3 وجبات ثابتة فطار, غدا, عشا وتكون وجبات متكاملة غنية بالعناصر الغذائية المفيدة. و نظام الأكل والوجبات بيختلف حسب هدف الشخص, و طبيعة يومه , واحتياجاته اليومية.
المكملات الغذائية منتجات مستخلصة من الأكل الطبيعي غنية بالعناصر الغذائية بشكل كبير جداً عشان تساعدنا نكمل إحتياجاتنا اليومية من العناصر الغذائية اللى مش بنقدر ناخد كفايتنا منها بشكل كامل من الوجبات اليومية وواضح من الإسم إنها حاجة مكملة بنستخدمها بجانب الأكل الطبيعى مانقدرش نستخدمها بدل الأكل.
قبل ظهور المكملات كان الإعتماد على الأكل بشكل كامل لكن مع مرور الوقت العادات الغذائية اتغيرت و إيقاع الحياة بقى أسرع ده بدوره أثر على القيم الغذائية للأفراد و بقى في شريحة كبيرة مابتقدرش تاخد إحتياجاتها اليومية من الأكل بشكل كامل خاصة الأشخاص اللي طبيعة يومهم فيها مجهود بدني عالي, والرياضيين اللي بيمارسوا رياضات بدنية عالية, وهنا بيجي دور المكملات الغذائية فى توفير أو تعويض الفرق فى القيم الغذائية دي عشان نقدر نكمل باقي احتياجاتنا اليومية حسب الهدف الشخصي لكل واحد فينا.
المفروض على مدار اليوم أياً كان النظام الغذائي اللي ماشيين عليه يوفر للجسم احتياجاته اليومية من:
- البروتين بمصادره المختلفة ( منتجات الألبان – اللحوم – الدواجن - البقوليات - الأسماك ).
- النشويات ( الأرز – المكرونة – البطاطا – البطاطس – الشوفان ).
- الدهون الصحية ( زيت الزيتون – زيت حبة البركة – زيت بذرة الكتان – زيت الذرة الصافي – الزبد الطبيعية ).
- الفيتامينات والمعادن ( الخضار والفاكهة ).
و في حالة إنك مابتقدرش تمشي على نظام متوازن و محسوب يوفرلك الإحتياجات دي من الغذاء بتبدأ تدعم نظامك ده بالمكملات الغذائية بتحسب إيه العجز اللى حاصل فى نظامك و تستخدم المكملات المناسبة اللى تزودك بيه سواء مكملات البروتين – الأحماض الأمينية – المالتي فيتامين – الكاربوهيدرات – السوبر فودز واحبوب الكاملة والبذور لو عايز توفر بدايل صحية لوجباتك.
الفرق الجوهرى بين الأكل والمكملات الغذائية إن المكملات بتوفرلك تركيزات أعلى بطريقة أسهل و أسرع فى الاستخدام عشان تسهل عليك تكمل احتياجاتك من السعرات الحرارية والعناصر الغذائية على مدار اليوم.
المكملات بنستخدمها بجانب الأكل لأنها مابتغنيش عن الأكل هي عامل مساعد ماينفعش نعتمد عليه بشكل كلي أو يكون له الأولوية على الأكل والنظام الغذائي المتوازن.
فلو عايز توصل لأفضل النتايج بتبدأ تحسب إحتياجاتك اليومية من السعرات الحرارية وتقسمها على العناصر الغذائية بروتين و نشويات و دهون صحية وتشوف هتقدر توفر إيه من الأكل والباقي تعوضه بالمكملات الغذائية المناسبة.
